محمد عبد العال يكتب : “المَصْطَبَة الاقْتِصَاديَّة 1”

يسعدني أن نلتقي مجدداً في مساحة فكرية جديدة، نترك فيها صخب المصطلحات الجافة، لنجلس معاً على “المَصْطَبَة الاقْتِصَاديَّة”.

الاقتصاد ليس مجرد أرقام في ميزانيات الدول، بل هو تفاصيل حياتنا اليومية ، هو حديثنا عن الغلاء، عن مستقبل أولادنا، وعن كيفية إدارة أزماتنا “بميزان ذهب”.

على المصطبة، سنستعيد روح “سهرات الفيشاوي” الرمضانية، ولكن بصبغة عصرية.

سنتناقش في كل ما يهمكم، بمشاركة “أم فوزي” بذكاء الفطرة، وابنها الشاب “فوزي تيك توك”، لنصل معاً إلى “الحكمة” الاقتصادية بأسلوب بسيط وصادق.

أولى حكاياتنا اليوم حول: “لماذا ننتظر وقوع الأزمة لنبدأ التفاوض؟ وكيف نمنع المشكلة من المنبع؟”.

المشهد : نسمة هواء مصرية عليلة، وصوت “صبّ القهوة ” يكسر هدوء المصطبة .

“أم فوزي” جالسة تلوّح بقطعة قماش بضيق، و”فوزي تيك توك ” عينه في الموبايل ويحرك رأسه بأسى وهو يتابع الأخبار.

فوزي باندفاع: “يا أستاذنا.. ينظر لى ، العالم كله ملوش سيرة غير التفاوض. مفاوضات في روسيا ، ومفاوضات فى باكستان ومفاوضات فى واشنطون و في الدوحة، ومسقط ، ومفاوضات بين البنوك والشركات، وحتى جاري بسيوني قعد النهاردة يتفاوض مع مراته ساعتين عشان يرجع البيت! ، هو إحنا ليه بنحب الجرجرة ما دام في الآخر هنقعد ونتفق، ليه بنوجع دماغنا ودماغ العالم من الأول؟”.

أم فوزي بلهجة ساخرة: “يا وكستي عليك يا فوزي.. ” التيك توك ” لحس عقلك ، يا ابنى ما هو لو مفيش خناقة، مفيش حد هيحس بقيمته!! لازم نشد الحبل عشان لما نرخي نبان كرماء ، أومال يعني عايز الدنيا تمشي سمن على عسل كدة من غير مناهده؟”.

الأستاذ “أنا” بهدوء وثقة: “تعالي يا أم فوزي، ركزي في الكلام ده ، كلام فوزي فيه جانب اقتصادي عميق جداً بنسميه تكلفة الفرصة البديلة وتكلفة الصراع ، يا ولاد، التفاوض في حد ذاته حل، بس هو حل غالي جداً ، العالم بيصرف تريليونات الدولارات على السلاح، والتعويضات، والمحامين، واللجان ، وكل ده عشان نوصل لنقطة كان ممكن نوصل لها بـ رشة ملح في الأول”.

السؤال مش ليه بنتفاوض؟ السؤال ليه بنسمح للمشكلة إنها تتولد أصلاً؟

“في الاقتصاد، فيه حاجة اسمها الحوكمة والشفافية ، لو القواعد واضحة من الأول، والكل عارف حقوقه وواجباته، والعدل هو المسطرة مش هنحتاج لماراثون المفاوضات اللي بيستنزف جيب الناس وصحتهم ، منع المشكلة من المنبع معناه استباق الأزمات ، يعني بدل ما نقعد سنة نتفاوض على وقف الحرب كان الأولي ندرس ليه بنحارب بعض من الأول ، وبدل ما نتفاوض على مين يدفع تكلفة وتعويضات الحرب ، كان الأولى نحترم مصالح بعض من البداية.”

فوزي بتعجب: “يعني يا أستاذنا، إحنا بنصرف 100 جنيه عشان نحل مشكلة كان ممكن نمنعها بـ 5 جنيه بس؟”.

الأستاذ: “بالظبط يا فوزي ، الفرق هو الوعي والوقاية. المصيبة إن البشر أحياناً بيستمتعوا بالبطولة في حل الأزمات، وبينسوا إن العبقري الحقيقي هو اللي بيخلي الأزمة متحصلش أصلاً ، وعشان كدة المصطبة دي معموله.. عشان نفكر إزاي نوفر تكلفة العناد ونستثمرها في بناء المستقبل.”

أبو العريف عبقرينو الزمان بدرجة مصطبجى أول AI صائحاً : “التفاوض هو فن إصلاح ما أفسده العناد ، والذكاء هو ألا نترك للعناد مكاناً على المصطبة من الأساس.”

الاستاذ : ” ارفع العناد وشرفونا فى المصطبة اللى جاية “.

محمد عبد العال

خبير مصرفي